સોમનાથ સ્વાભિમાન પર્વ અંતર્ગત આયોજિત શૌર્ય યાત્રા અને જંગી જાહેરસભામાં પ્રધાનમંત્રી નરેન્દ્ર મોદીએ જણાવ્યું કે સોમનાથનો ઇતિહાસ વિનાશનો નહીં પરંતુ વિજય અને પુનઃનિર્માણનો ઇતિહાસ છે.
સોમનાથ સ્વાભિમાન પર્વ અંતર્ગત ઐતિહાસિક શૌર્ય યાત્રા
સોમનાથ મંદિર પર પ્રથમ આક્રમણના એક હજાર વર્ષ અને પુનઃનિર્માણના 75 વર્ષ પૂર્ણ થવાના નિમિત્તે આયોજિત સોમનાથ સ્વાભિમાન પર્વ અંતર્ગત દેવાધિદેવ મહાદેવની પાવન ભૂમિ સોમનાથ ખાતે ભવ્ય શૌર્ય યાત્રાનું આયોજન કરવામાં આવ્યું હતું. પ્રધાનમંત્રી નરેન્દ્ર મોદી આ શૌર્ય યાત્રામાં સહભાગી બની શૂરવીરોને નમન કર્યું અને સોમનાથ મંદિરમાં મહાપૂજા અર્ચના કરી વિશ્વ કલ્યાણ માટે પ્રાર્થના કરી હતી.
આ પણ જુઓ ગાંધીનગર સમાચાર
શૌર્ય યાત્રામાં અલૌકિક ભક્તિમય માહોલ
શૌર્ય યાત્રામાં 108 અશ્વો, શંખ અને ડમરુના નાદ સાથે હર હર મહાદેવના ગુંજારાથી સમગ્ર સોમનાથ ભક્તિમય બની ગયો હતો. યાત્રા માર્ગ પર સાધુ સંતો, વિવિધ સમાજોના આગેવાનો, શિવભક્તો અને સનાતનપ્રેમીઓ મોટી સંખ્યામાં ઉપસ્થિત રહ્યા હતા. વિવિધ પરંપરાગત નૃત્યો અને લોકકલાઓ દ્વારા ભારતની સંસ્કૃતિ અને વિરાસતનું જીવંત દર્શન કરાવવામાં આવ્યું હતું.
પ્રધાનમંત્રી નરેન્દ્ર મોદીએ શૌર્ય યાત્રા દરમિયાન આપ્યું સંબોધન
પ્રધાનમંત્રી નરેન્દ્ર મોદીએ ખુલ્લી કારમાં ઊભા રહી જનસમુદાયને અભિવાદન સ્વીકાર્યું હતું. વીર હમીરજી ગોહિલ અને સરદાર વલ્લભભાઈ પટેલની પ્રતિમાને પુષ્પાંજલિ અર્પણ કરી તેમણે રાષ્ટ્ર માટે બલિદાન આપનાર વીરોને વંદન કર્યું હતું. શૌર્ય યાત્રા બાદ સોમનાથના સદભાવના ગ્રાઉન્ડ ખાતે યોજાયેલી જંગી જાહેરસભામાં તેમણે દેશવાસીઓને સંબોધન કર્યું હતું.
સોમનાથનો ઇતિહાસ વિનાશનો નહીં પરંતુ વિજયનો છે
પ્રધાનમંત્રી નરેન્દ્ર મોદીએ જણાવ્યું કે સોમનાથ મંદિરનો ઇતિહાસ વિનાશ અને પરાજયનો નથી પરંતુ વિજય અને પુનઃનિર્માણનો ઇતિહાસ છે. એક હજાર વર્ષ પહેલાં સોમનાથ પર થયેલા આક્રમણો છતાં આજે પણ મંદિર પર લહેરાતી ધ્વજા ભારતની શક્તિ અને સામર્થ્યનું પ્રતિક છે. ગઝનવીથી લઈને ઔરંગઝેબ સુધીના આક્રમણકારો ઇતિહાસના પાનાઓમાં સમેટાઈ ગયા પરંતુ સોમનાથ અડીખમ ઊભું રહ્યું છે.
મઝહબી ઉન્માદ અને ઇતિહાસ છુપાવવાના પ્રયાસો પર પ્રહાર
પ્રધાનમંત્રીશ્રીએ જણાવ્યું કે આક્રમણોના સત્યને ઢાંકવા માટે આઝાદી બાદ કેટલાક રાજનેતાઓ અને ઇતિહાસકારોએ મઝહબી ઉન્માદને માત્ર લૂંટ તરીકે દર્શાવવાનો પ્રયાસ કર્યો. તુષ્ટિકરણના ઠેકેદારોએ નફરત, અત્યાચાર અને આતંકનો સાચો ઇતિહાસ દેશથી છુપાવી રાખ્યો હોવાનું તેમણે કહ્યું.
સરદાર પટેલ અને સોમનાથ પુનઃનિર્માણ
પ્રધાનમંત્રી નરેન્દ્ર મોદીએ જણાવ્યું કે સરદાર વલ્લભભાઈ પટેલે આઝાદી બાદ સોમનાથ મંદિરના પુનઃનિર્માણનો સંકલ્પ કર્યો હતો અને અનેક વિરોધો છતાં મંદિરનું પુનઃનિર્માણ શક્ય બન્યું. આજે પણ કેટલીક તાકાતો સોમનાથના પુનઃનિર્માણનો વિરોધ કરતી હોવાનું તેમણે ચેતવણીરૂપે જણાવ્યું અને દેશને એકજૂટ રહેવા આહ્વાન કર્યું.
વિરાસતથી વિકાસ તરફ ભારતની યાત્રા
પ્રધાનમંત્રી નરેન્દ્ર મોદીએ જણાવ્યું કે 140 કરોડ ભારતીયો વિરાસતથી વિકાસની પ્રેરણા લઈને વિકસિત ભારતના નિર્માણ માટે સંકલ્પિત છે. સોમનાથ મંદિર માત્ર એક ધાર્મિક સ્થાન નથી પરંતુ ભારતના આત્મવિશ્વાસ, આધ્યાત્મિક શક્તિ અને સંસ્કૃતિનું કેન્દ્ર છે.
મુખ્યમંત્રી ભૂપેન્દ્ર પટેલનું સંબોધન
મુખ્યમંત્રી ભૂપેન્દ્ર પટેલે જણાવ્યું કે સોમનાથ સ્વાભિમાન પર્વ ભારતના આત્મસન્માન અને અડગ સંકલ્પની ઉજવણી છે. સોમનાથ મંદિર ભારતના આત્માનું પ્રતિક છે અને સરદાર પટેલના દ્રઢ નિશ્ચયનું જીવંત સ્મારક છે.
નાયબ મુખ્યમંત્રી હર્ષ સંઘવીનો સંદેશ
નાયબ મુખ્યમંત્રી હર્ષ સંઘવીએ જણાવ્યું કે સોમનાથ શૌર્ય યાત્રા વર્ષો સુધી યાદગાર રહેશે. ભારત ક્યારેય પોતાના સ્વાભિમાનનો સોદો નહીં કરે એ સંકલ્પ આજે પ્રધાનમંત્રી નરેન્દ્ર મોદીના નેતૃત્વમાં રાષ્ટ્રની નીતિ બની ગયો છે.