નેશનલ સ્કૂલ્સ ચેસ ચેમ્પિયનશિપ 2025માં ગુજરાતના ખેલાડીઓએ શાનદાર પ્રદર્શન કરી રાજ્યનું નામ રોશન કર્યું છે. તાજેતરમાં આસામના ગુવાહાટી ખાતે યોજાયેલી 14મી નેશનલ સ્કૂલ્સ ચેસ ચેમ્પિયનશિપ 2025માં ગુજરાતના પ્રતિભાશાળી ચેસ ખેલાડીઓએ પોતાની કુશળતા, વ્યૂહરચના અને અદમ્ય આશાવાદથી દેશભરમાં પ્રશંસા મેળવી છે.
આ ચેમ્પિયનશિપમાં વિવિધ વય જૂથોની કેટેગરીમાં અનેક રાજ્યોના પ્રતિભાશાળી ખેલાડીઓએ ભાગ લીધો હતો, જેમાંથી ગુજરાતના ખેલાડીઓએ પોતાનું પ્રભાવશાળી સ્થાન સ્થાપિત કર્યું. ખાસ કરીને અંડર-11 ઓપન કેટેગરીમાં ધ્યાન પટેલે સમગ્ર ટુર્નામેન્ટ દરમ્યાન અપરાજિત રહીને 8.5 પોઈન્ટ મેળવી ગોલ્ડ મેડલ જીત્યો અને ચેમ્પિયન બનવાનો ગૌરવ મેળવનાર બન્યો. તેની શાંતિપૂર્ણ રમત, સચોટ આયોજન અને મજબૂત નિર્ણય શક્તિએ દરેક મેચમાં વિરોધીઓને દબાણમાં રાખ્યા હતા.
અંડર-9 ગર્લ્સ કેટેગરીમાં પટાવરી આરાધ્યા સૌરભે પણ ઉત્તમ પ્રદર્શન કરીને 7 પોઈન્ટ સાથે બોર્ડમાં ચોથું સ્થળ મેળવ્યું. નાની વયે આટલી ઉત્તમ સિદ્ધિ મેળવવી, ખરેખર પ્રશંસનીય છે અને ભવિષ્યમાં તેના માટે અનેક નવી સફળતાઓના દ્વાર ખોલે છે.
ગુજરાતના અન્ય પ્રતિભાશાળી ખેલાડીઓએ પણ ચેમ્પિયનશિપમાં પોતાની પ્રતિભા સાબિત કરી. રિષિત શર્માએ અંડર-15 ઓપન કેટેગરીમાં 7 પોઈન્ટ મેળવ્યાં, જ્યારે અંશ અગ્રવાલે અંડર-9 ઓપન કેટેગરીમાં 6.5 પોઈન્ટ મેળવી સારું સ્થાન પ્રાપ્ત કર્યું. યતી અગ્રવાલે અંડર-13 ગર્લ્સ કેટેગરીમાં 6 પોઈન્ટ મેળવી મજબૂત સ્પર્ધા આપી હતી.
આ બધા ખેલાડીઓના પ્રદર્શનથી માત્ર ગુજરાતને ગર્વનો અનુભવ નથી થયો, પરંતુ રાજ્યના હજારો યુવા ખેલાડીઓ માટે પ્રેરણાનો સ્ત્રોત પણ બન્યો છે. દબાણ વચ્ચે સ્માર્ટ મૂવ્સ, સ્થિર મનોદશા અને શિસ્તબદ્ધ રમત ચેસની સાચી ભાવનાને ઉજાગર કરે છે. આ સફળતા સાબિત કરે છે કે સતત મહેનત, સખત પ્રેક્ટિસ અને સમર્પણથી કોઈપણ મોટી સિદ્ધિ પ્રાપ્ત કરી શકાય છે.
ગુજરાત સ્ટેટ ચેસ એસોસિએશને તમામ ખેલાડીઓને અભિનંદન પાઠવ્યા છે અને ભવિષ્યમાં વધુ સફળતાઓ મેળવવા શુભેચ્છા આપી છે. GSCA પ્રમુખ અને AICF સચિવ શ્રી દેવ પટેલે પણ તમામ વિજેતાઓ અને પાર્ટિસિપેશન કરનાર ખેલાડીઓની પ્રશંસા કરતા જણાવ્યું કે આવા પ્રદર્શનોથી ગુજરાત ચેસનું ભવિષ્ય અત્યંત ઉજ્જવળ દેખાઈ રહ્યું છે.
નેશનલ સ્કૂલ્સ ચેસ ચેમ્પિયનશિપ 2025માં ગુજરાતના આ ખેલાડીઓએ સ્થાપિત કરેલી સિદ્ધિઓ રાજ્ય માટે ગર્વની બાબત છે અને આવનાર સમયમાં તેઓ રાષ્ટ્રીય તેમજ આંતરરાષ્ટ્રીય સ્તરે વધુ ઉંચાઈ સર કરશે તેવા વિશ્વાસ સાથે સમગ્ર ગુજરાત તેમની આગામી સફળતાઓની રાહ જોઈ રહ્યું છે.