અરવલ્લી | ક્રાઇમ / લોકલ ન્યૂઝ ડેસ્ક
અરવલ્લી જિલ્લામાં માર્ગ અકસ્માતોની ઘટનાઓમાં સતત વધારો જોવા મળી રહ્યો છે. આ વચ્ચે ગત રાત્રીએ બનેલી એક કરુણ અને અસામાન્ય દુર્ઘટનાએ સમગ્ર પોલીસ બેડામાં શોકની લાગણી ફેલાવી દીધી છે. આ અકસ્માતમાં કોઈ ખાનગી વાહન નહીં પરંતુ ખુદ પોલીસ વિભાગની બે સરકારી ગાડીઓ સામસામે ટકરાઈ, જેમાં ટીંટોઈ પોલીસ સ્ટેશનની PCR વાનના ચાલક મહેશ પટેલનું ઘટનાસ્થળે જ મોત નિપજ્યું છે.
બામણવાડ પાટિયા પાસે મોડી રાત્રે અકસ્માત
પ્રાપ્ત માહિતી મુજબ, ટીંટોઈ પોલીસ સ્ટેશનની PCR વાન બામણવાડ પાટિયા રોડ પાસે રસ્તાની સાઈડમાં ઊભી હતી. તે દરમિયાન મોડાસા તરફથી પૂરઝડપે આવી રહેલી શામળાજી પોલીસ સ્ટેશનની સરકારી જીપે અચાનક જ PCR વાનને ધડાકાભેર ટક્કર મારી હતી. ટક્કર એટલી ભયાનક હતી કે PCR વાનને ભારે નુકસાન થયું હતું.
કેદીઓ મુકીને પરત ફરી રહી હતી શામળાજી પોલીસ
મળતી વિગતો અનુસાર, શામળાજી પોલીસની જીપ ભિલોડા કોર્ટમાંથી કેદીઓને મોડાસા સબજેલમાં મૂકીને પરત ફરી રહી હતી. રસ્તા પર ઉભેલી PCR વાન નજરે ન ચડતાં અથવા નિયંત્રણ ગુમાવતા આ અકસ્માત સર્જાયો હોવાનું અનુમાન વ્યક્ત કરવામાં આવી રહ્યું છે. જોકે, અકસ્માતનું ચોક્કસ કારણ જાણવા માટે તપાસ ચાલી રહી છે.
PCR વાનના ડ્રાઇવરનું ઘટનાસ્થળે મોત
અકસ્માતમાં ટીંટોઈ PCR વાનના ચાલક મહેશ પટેલને ગંભીર ઈજાઓ પહોંચી હતી. ઈજાઓ એટલી ગંભીર હતી કે તેમને બચાવી શકાયા નહીં અને તેમનું ઘટનાસ્થળે જ કરુણ મોત થયું હતું. આ ઘટનામાં PCR વાનમાં હાજર અન્ય એક પોલીસ કર્મી તથા એક હોમગાર્ડ જવાનને પણ ઈજાઓ પહોંચતા તેમને તાત્કાલિક સારવાર માટે સરકારી હોસ્પિટલ, મોડાસા ખાતે ખસવી દેવાયા હતા.
પોલીસ બેડામાં શોકની લાગણી
ઘટનાની જાણ થતાં જ ઉચ્ચ પોલીસ અધિકારીઓનો કાફલો ઘટનાસ્થળે પહોંચી ગયો હતો. પોતાની જ વિભાગની ગાડીઓ વચ્ચે થયેલા અકસ્માતમાં એક ફરજપરસ્ત જવાન ગુમાવતા અરવલ્લી પોલીસ બેડામાં ભારે શોકની લાગણી છવાઈ ગઈ છે. મૃતક મહેશ પટેલની નિષ્ઠાવાન સેવા અને ફરજપ્રતિ પ્રતિબદ્ધતા અંગે સહકર્મીઓએ શોક વ્યક્ત કર્યો છે.
અકસ્માતનો ગુનો નોંધાઈ તપાસ શરૂ
પોલીસ દ્વારા આ મામલે અકસ્માતનો ગુનો નોંધી લેવામાં આવ્યો છે અને સમગ્ર ઘટનાની વિગતવાર તપાસ હાથ ધરવામાં આવી છે. વાહનોની ઝડપ, સ્થળની સ્થિતિ અને અકસ્માતના કારણો અંગે તપાસ બાદ વધુ વિગતો સામે આવવાની શક્યતા છે.